Nafarroako ekonomia %1,4 haziko da datorren urtean, gobernuaren arabera

Euskalerria Irratia 2022ko ira. 7a, 13:52

Aurtengo hazkundea baino baxuagoa izanen da 2023koa, Ekonomia eta Ogasun departatamentuak egindako aurreikuspenen arabera. Hala ere, aurrekontuetarako gastu sabaia igoko dutela aurreratu du Elma Saiz kontseilariak, bozeramaile gisa egindako lehenengo agerraldian.

"Harrotasunez eta arduraz" hartu du bozeramaile kargua Elma Saiz Ekonomia eta Ogasun kontseilariak. Eta zehaztu duenez, “Nafarroako Gobernu guztiaren bozeramailea” izanen da. Astelehenean Geroa Bai eta Ahal Duguk hori egiteko eskatu zioten.

Haren izendapena, gobernuak orain arte esandakotik argudiatu du: "Une honetan ekonomia da lehentasuna”. Horregatik, hortik hasi da, datorren urterako aurreikuspenak azalduz. “Energiaren krisia” bizi du munduak, haren hitzetan; baina nafar ekonomiak hazten jarraituko du.

%4 egin du gora aurten ekonomiak, barne produktu gordinaren arabera; eta %1,4ko hazkundea aurreikusten dute 2023rako. Enplegua 2,5 haziko da aurten, eta 0,4 datorren urtean. Inflazioak ere behera eginen duela aurreikusi du bere departamentuak: 8,9tik, 4,8ra.

Herritarrek horri aurre egiteko neurri fiskalak lantzen ari direla azaldu du. Enpresa txiki eta ertainentzako eta autonomoentzako kenkaria urtarrilaren 1ean sartuko da indarrean; eta familientzako beste bat prestatzen ari dira. Akordio bat sinatu dute zenbait talde politikok, ez du zehaztu zeintzuk.

Aurreikuspen horiekin, datorren urteko aurrekontu orokorrak handiagoak izanen direla aurreratu du.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!