Sanfermintza saio berezia eginen du aurten ere Euskalerria Irratiak. Bihartik hasita sanferminetako eguneko protagonistak, elkarrizketak, zuzeneko konexioak eta festen hasieraren unea bizitzeko eta entzuteko aukera izanen da. Seminario etxean izanen dira Juan Kruz Lakasta eta Reyes Ilintxeta kazetariak, kalean eta udaletxean, berriz, Haritz Paskual.
Iruñeko Udalak herri sanferminei jarritako betoaren ondorioz, Zaldi Zuriko tabernaren terrazara itzuliko da Euskalerria Irratia, hilaren 7tik aurrera. Egunero, eguerdiko hamabietatik hasita, festaren ekitaldi eta jarduera guztietara joko dute kazetariek eta Zaldi Zuriko mahaitik festako protagonista nagusienak igaroko dira: musikariak, peñetako kideak, kirolariak, politikariak, entzierro korrikalariak...eta nola ez, musika zuzenean, Tipex, Izugarri, Burutik, Beietz, Guarinba, Raimundo El Canastero edota Tatxers taldeen zuzeneko emankizunekin.