Proposamen anitza 2022 Sanferminak iragartzeko kartelen finalean

Iruindarrek dagoeneko hautatu dezakete zein izanen den pandemia osteko lehendabiziko Sanferminetako kartela. Epaimahaiak 10 afitxa hautatu ditu jasotako 601 proposamenen artean. Maiatzaren 4ean bukatuko da bozketa epea.

Hamar finalistak zein diren ezagututa, herritarrek egingo dute azken aukeraketa, eta botoa hainbat bideren bidez eman ahal izango dute, maiatzaren 4ra arte. Oinarrietan jasotzen den bezala, Iruñean erroldatutako pertsonek bakarrik erabili ahal izango dute botoa. Gainera, botoa NAN zenbaki bati lotuta egongo da, eta, beraz, boto bakarra zenbatuko da pertsona bakoitzeko. Horretarako, bozketan izena eta lehen abizena eta NANaren, AIZaren edo pasaportearen zenbakia adierazi beharko dira, horrela datuen egiazkotasuna eta botoaren baliozkotasuna egiaztatu ahal izango baitira.

Bozketarako hainbat bide ireki dira. Horrela, modu telematikoan egin ahal izango da, www.pamplona.es web orrian eta www.pamplonaescultura.es webgunean prestatutako sarbide baten bidez. Kasu horretan, bozketa maiatzaren 4ko 23: 59an itxiko da. Bestalde, herritarren arretarako 010 edo 948420100 telefonoaren bidez ere bozkatu ahal izango da. Telefono hori maiatzaren 4ko 19: 00ak arte egongo da eskuragarri, zerbitzu horren ohiko telefono-ordutegian (08: 00etatik 19: 00etara eta larunbatetan 09: 30etik 13: 30era). Eta, azkenik, aurrez aurre bozkatu nahi dutenek hiriko edozein Civivoxetan bozkatu ahal izango dute, bertan jarriko diren hautestontzietan dagokion txartela sartuz. Kasu horretan, maiatzaren 4an amaituko da epea, zentroak ixteko ordutegiarekin batera (astelehenetik larunbatera, 9etatik 14etara eta 17etatik 21etara).

Kartelak Kondestablearen Jauregiko patioan egongo dira ikusgai aukeraketa egunera arte eta, gainera, udalaren webgunean ere kontsultatu ahal izango dira. Maiatzaren 5ean izango da kartel bozkatuena.