Babes ofizialeko 238 etxebizitza eraiki behar dituzte Iruñeko sei auzotan, 79 salerosketa erregimenekoak eta beste 159 alokairukoan, Nasuvinsa enpresa publikoak eta Iruñeko Udalak sinaturiko hitzarmenaren arabera.
Atzo, Iruñeko Udaleko Urbanismo Batzordean, EH Bilduk mozioa aurkeztu zuen, alokairuen igoera etengabearen aitzinean Udala geldirik dagoela eta kudeaketa okerra egiten ari dela salatzeko. Mozioa aurrera atera zen PSNren eta Geroa Bairen botoekin, eta Navarra Sumaren aurkakotasunarekin.
Mozioaren eztabaidan, EH Bilduko eledun Borja Izagirrek Nasuvinsarekin dagoen hitzarmena nahita blokeatzea egotzi zion Navarra Sumari. Koalizio eskuindarraren izenean, Juan Jose Etxeberria Urbanismo zinegotziak Nafarroako Gobernuari egotzi zion hitzarmena blokeaturik egotearen ardura, eta gaineratu zuen martxorako Nasuvinsak mugimendurik egiten ez badu, hitzarmena iraungitzat emanen dutela, eta proiektuari haien kaxa ekinen diotela.
Geroa Baiko zinegotzi Javier Leozek gezurretan aritzea leporatu zion Etxeberriari, baita hitzarmenaren tramitazioa nahita atzeratzea ere. PSNko hautetsi Federico Colmenarrek esan zuen Navarra Sumak interes falta bistakoa duela afera honetan.