Txantreako bizilagunen % 86,4 eremu urdinaren aurka daude, Carlos Vilches soziologo, ikertzaile eta NUPeko irakasleak zuzendu duen inkestaren arabera. Txantrea Auzo Ekimena Plataformak atzo aurkeztu zituen emaitzak.
Ikerketa horretatik ondorioztatzen da egoiliarren %9,3ri berdin zaiola araututako aparkalekua, eta soilik %3,1 dago eremu urdinaren alde.
Ildo beretik, elkarrizketatuen %94,4k kritikatu du Iruñeko Udalak ez duela interesik izan auzotarrek, merkatariek eta auzoko erakundeek eremu urdina jartzeari buruz duten iritzia ezagutzeko. Auzotarren %26,6k "informazio gutxi" duela dio, eta bizilagunen %1,6 bakarrik sentitzen da "oso informatuta".
Landa-lana azaroaren lehen astean egin zuen berrogei laguneko talde batek. 1.040 elkarrizketa aleeatorio egin zitzaizkien Txantreako bizilagunei.
