Gabonetako argiztapena ohi baino hiru egun aurretik piztuko da aurten, Iruñeko merkatariek horrela eskatu diotelako Udalari. Ohiturak esaten zuen, Iruñean, azaroaren 29an, Done Saturdi egunean hasten zela gabon garaia eta orduantxe pizten zirela argiak.
Udalak argiztapen berezi honen berri eman aurretik, aurten, aurrekoarekin alderatuta ez da aldaketa handiegirik espero. Iaz %25 gehiago gastatu zen gabon argiztapenean.
2020an 236 argi-arku jarri ziren hiri osoan zehar, kale-argien dekorazioa Zabalgunean, Gabonetako irudiak hainbat espaziotan, hala nola Askatasunaren, Gurutzearen, Vianako Printzearen edo Merindadeen plazetan eta Udaletxearen, Udaletxe Plazaren, Gazteluko Plazaren eta Karlos III.aren fatxadarako bereziki diseinatutako sorkuntzetan.
Aurrekontua 156.337,50 eurokoa izan zen, 2019an gastatutakoa baino % 25 gehiago.
Joan den apirilean, Udaleko Tokiko Gobernu Batzarrak Gabonetako argiak hornitzeko kontratuaren luzapena onartu zuen, 165.505 euroko kostuarekin.