Sanfermin txiki, bertan behera aurten ere

Sanfermin txikiko 2019ko irudi bat.

Alde Zaharreko jai batzordeak erabaki du Aldapako sanfermin festak bertan behera uztea eta jai jarduerarik ez antolatzea. Hala ree, hainbat kultur jarduera eskainiko ditu irailaren 23tik 27ra bitartean.

Alde Zaharreko jai batzordeak sanfermin txiki jaiak bertan behera uztea erabaki du, eta ez du festa giroko jarduerarik antolatuko irail amaierarako. Hala azaldu zuten atzo ohar batean. Batzordeak aste honetan bertan helarazi dio erabakia Iruñeko Udalari. Iaz egin zuen bezala, elkarteak "auzotarren ongizateari lehentasuna ematea" eta jaiak "segurtasun baldintzetan" ospatu arte atzeratzea erabaki du.

Dena den, irailaren 23tik 27ra bitartean, Alde Zaharreko bizilagunek aukera izango dute batzordea aste horretarako prestatzen ari den kultur jardueretan parte hartzeko. Datozen egunetan iragarriko dute zein jarduera egingo dituzten, baina aurreratu dutenez, auzoko bizilagunei zuzenduta egongo dira, ez dute jai girorik izango, eta parte hartzaile guztien segurtasuna bermatzeko beharrezkoak diren neurriak errespetatuko dituzte.

Jai txikirik gabeko bigarren urtea da Iruñean. Ekainean, Enrique Maya alkateak aitortu zuen bere "ilusioetako" bat uda amaieran hirian zezenketak egin ahal izatea zela, horrelako ekitaldiak sanfermin txikiko egunetan sartzeko aukerarekin. Hala ere, egoera epidemiologikoa dela eta, festa egitarau oro bertan behera gelditu behar izan da berriro ere.