Udako programazioan Iruñeak gazte euskaldunak baztertu dituela salatu du AETk

Gazelaniazko jarduerak baino ez ditu antolatu Navarra Sumaren udal taldeak, ekaina eta iraila bitartean egiten ari diren 'Txankletak 2021' egitarauan.

Iruñeko Udalak ez du euskarazko jarduerarik antolatu 14tik 30 urte bitarteko gazteentzat, uda honetan. Kirol eta kultur ekintzak, txangoak eta Iruñean barna bisita gidatuak barne hartzen ditu “Txankletak 2021: Bizkortu zure uda” egitarauak, ekainaren 15etik irailaren 30era bitartean, baina dena gaztelaniaz izanen dira. 

Administrazioan Euskaraz taldeak egoera salatu du, gogora ekarriz Iruñean herritarren %11 inguru dela euskalduna. "Adin tarte horretan portzentaje hori igo egiten da". nabarmendu dute ohar bidez. "Hala ere, Iruñeko Udalak ez ditu gazte euskaldunak kontuan hartu egitaraua diseinatzerakoan".

Iruñeko Udalaren euskararen aldeko "ia politika bakarra" euskarazko ekitaldiak antolatzea dela zehaztu du taldeak. "Ikusten denez, alor horretan ere gauzak behar bezala ez dira egiten", salatu dute.