Pasa den urriaren 15ean gertatu zen. Javier Labairuk Iratxe Monasterioaren kalean, zonalde urdinean kotxea aparkatu zuen tiketik edo agiririk utzi gabe. Garabiak ibilgailua eraman zuen. Ordu batzuk geroago Labairu bera joan zen garabiaren egoitzara, udaltzain baten laguntzaz eta isuna ordaindu gabe kotxea eraman zuen. Ibilgailua ateratzeko dokumentazioan, eskuz idatzitako orri bat azaltzen da, non trafiko eta garabi zerbitzuan lan egiten ez duen udaltzain batek Labairuren kasuan arau hausterik gertatu ez zela adierazten zuen, agiriak ez du datarik. Udaltzain hau, Labairuren ingurukoa omen da, EH Bilduk salatu duenez, kirol arloan, Anaitasuna eskubaloi taldean aritu zenekoa.
Iruñeko EH Bildu, egoeraren jakitun, informazioa eskatu du eta behin eta berriz ukatu egin zaio. Kasua estali nahi izan du Navarra Sumak baina azkenean txostena publiko egin da.
Joseba Asironen iritziz "Erakunde gisa, hiri honetako herritar guztiei eskatzen ari gara ibilgailua kentzea eta dagokion isuna ordaintzea, eta Herritarren Segurtasunerako arduradunak, zerbitzuaren arduradun politikoa izanik, hori ez egiteko pribilegioa izatea, eta, gainera, hori ezkutatzen saiatzea, ez da kontu txikia, jokabide inmoral eta politikoa baizik". Patxi Fernandez arloko zuzendariaren dimisioa ere eskatu du Asironek, etengabe informazioa ezkutatzen aritzeagatik.