Hamarkada bete da gaur Auzitegi Konstituzionalak 2011ko udal eta foru hauteskundeetara aurkezteko aukera eman ziola koalizioari. Auzitegi Gorenak Alderdien Legearen zerrendak baliogabetzeko hartutako erabakiaren aurka egin zuen horrela, aldeko sei boto eta kontrako bost botorekin. Taldearen "parte-hartze politikorako eskubidea" urratu zela uste du Konstituzionalak.
Duela hamarkada bat eskuinak "inposiziotik eta harrokeriatik" agintzen zuen Iruñean eta Nafarroan, EH Bilduren iritziz. Baina, herritarrengandik gertu egonda, "bestelako gobernantza eredua" posible dela erakutsi kolizioak, politikariek gaur eguerdian egindako ekitaldian azpimarratu dutenez: "Hamar urteotan funtsezko eragile politikoa izan gara". Iruñeko kasua jarri dute adibide: "Posible egin dugu eskuinari aurre egitea, ustelkeriak argitaratzea, guztion eskubideak erdigunean jartzea, politika feministak sustatzea edota politika sozialetan erreferente izatea". Etorkizunari begira, hori errepikatzea dute helburu.