Joseba Asironen udalak aurreko legegintzaldian egindako aldaketa kritikatuena izan zen Navarra Sumaren aldetik Pio XII etorbideko korridore jasangarria. Agintea hartu eta berehala iragarri zuen Enrique Maia alkateak 200 aparkaleku sortuko zituela etorbidean. Aurtengo urtarrilean erabilgarri ziren lehenego 51 lekuak. Aurrekontuak onartzeko PSNrekin egindako akordioaren ondotik, baina, atzera egin du eskuineko hirukoak.
Iruñeko Udaleko Tokiko Gobernu Batzarrak Pio XII etorbidea eta Navas de Tolosa kalearen azken zatia birmoldatzeko proiektua idazteko, obra zuzentzeko eta herritarrek parte hartzeko prozesu bat egiteko lizitazioa onartu du astelehen honetan. Proiektu hau Pio XII.aren korridore iraunkorraren bigarren fasearen parte da. Lizitazio honen enpresa esleipendunak paisaia-proposamen bat egin beharko du, non egungo aparkalekuen ordez berdeguneak jarriko diren.
Kontratuak 48.400 euroko hasierako aurrekontua du, formalizatzen denetik 50 egun naturaleko exekuzio-epea, eta laster abiaraziko da, prozedura ireki bidez, Nafarroako Kontratazioaren Atariaren bidez. Proposamenak aurkezteko epea 15 egunekoa izango da, argitaratzen direnetik zenbatzen hasita. Horrela, urrats hori egin ondoren, lanak 2021a amaitu baino lehen egin ahal izango dira, eta, azken kasu horretan, 500.000 euro inguruko inbertsio-aurreikuspena egingo da.
Pio XII.a berrurbanizatzeko proiektuak ikuspuntu teknikoa, funtzionala eta ekonomikoa uztartu beharko ditu, bai eraikuntza-fasean, bai kontserbazio- eta ustiapen-fasean. Era berean, parte hartzeko egituraketa izango du hasieratik; izan ere, merkatarien, bizilagunen, auzoko elkarteen eta abarren proposamenari irekiko zaio, eta horien ekarpenak azken proiektuan txertatuko dira, inplikatutako udal-arlo eta -zerbitzuek (Lorategiak, Mugikortasuna, Proiektuak, Herritarren Segurtasuna...) osatutako talde tekniko batek baliozkotu ondoren.