Hiru sindikatu horiek salatu dutenez, enpleguaren egoera "gero eta larriagoa" da Nafarroako administrazioetan: enpleguaren suntsitzea, ezegonkortasuna eta enplegu publikoa sortzeko borondate eza areagotzen ari dira, eta zerbitzu publikoak ahultzen dituen behin-behinekotasun mailak onartezinak dira. Era berean, plantillak handitzeko, ratioak hobetzeko eta lan kargak murrizteko beharra dago.
Horregatik, enplegu publikoaren "salbuespenezko egoerari" aurre egiteko legezko mekanismoak eskatu dituzte.
Nafarroako erakunde guztiei zuzendu dira, "gobernutik hasi eta azken udaleraino", beharrezkoak diren arau aldaketak bultzatzeko urratsak egin ditzaten, aparteko egonkortze prozesuak bideratzeko.
Horrekin batera, eskatu dute plantillen behar guztiak identifikatzeko eta horren arabera langile kopurua handitzeko; abian dauden enplegu publikoaren eskaintza prozesuetan kolektibo bakoitzaren beharren araberako ezohiko neurriak hartzeko; pribatizazio eta kanporatze politikekin amaitzeko; eta plantillak gaztetzeko eta aurretiko erretiroak sustatzeko planak egiteko.
Eskaera horiek bultzatzeko, Nafarroako sektore publikoko langile guztiei dei egin diete, mobilizazio bateratuen dinamikan "modu aktiboan" parte har dezaten, enplegua publikoa finkatzearen alde.