Miren Asiain Lora artista iruindarrak egin du Itzulia Basque Country txirrindularitza lasterketaren 60. edizioa iragarriko duen kartela. Apirilaren 5etik 10era egingo da lasterketaren aurtengo edizioa, publikorik gabe, eta ez da Nafarroatik igaroko.
Duela hiru urte, Euskadi Literatura Saria lan literarioen ilustrazioaren arloan irabazten duen artistak izaten du Itzuliko kartela egiteko ardura. Miren Asiain Lorak 'Un millón de ostras en lo alto de la montaña' lanarengatik jaso zuen Euskadi Literatura saria: "Ideia garatzen hasi nintzenean, bi protagonista nituen buruan, paisaia eta txirrindulariak. Txirrindulari horiek, gure paisaiak zeharkatuz eta pedalei eragiten imajinatu nituen, oharkabean pasatzen ez diren paisaietan zehar, eta argi txiki gisa pentsatu nituen, agian izar iheskorrak edo txinpartak balira bezala".