Enrique Maia Iruñeko alkateak adierazi duenez, Udalak Sanferminetako Mahaia deituko du, eta "lasaitasuna" eskatu du festekin gertatuko denaren inguruan. Gauzak "ongi" egingo dituztela ziurtatu du, osasun datuak "aintzat hartuta eta zentzuz".
Kazetarien aurrean egindako adierazpenetan, Maiak esan du "argi" dagoela Sanferminetako Mahaia deituko dutela. Baina azpimarratu du "parte hartzeko organoa" dela, "ez erabakitzekoa". Gainera, jaien inguruan "urduritasuna" dagoela uste du. "Badirudi jende guztiak Sanferminetako protagonista izan nahi duela", esan du.
Zentzu horretan, "lasaitasuna" eskatu du: "Gauzak ondo egingo ditugu". "Gehiengo zabalak ulertuko duen erabakia hartuko da, egiten dena egiten dela, osasun eta zentzuzko datuen menpe egongo garelako", azaldu du alkateak, eta ez du uste "inork uste duenik 2019koa bezalako txupinazoa posible izango denik".
Bestalde, zezenketak egiteko aukera aurreratu ote den galdetuta, Maiak esan du "zentzu komuneko kontua" dela. Gogorarazi duenez, "zezenketak egon badaitezke osasun arloan posible delako, eta Logroñon edo Santanderren zezenketa bat egon badaiteke, zergatik ez dugu baloratuko hemen egitea", eta "hemen San Ferminekin bat egiten badu, badirudi San Fermin dagoela eta jendea animatzen ari garela". Hala, "lehenik eta behin osasun arloa eta sen ona" izango direla azpimarratu du.
