Euskal preso politikoen eskubideen aldeko mobilizazioa egin dute gaur eguerdian ELA, LAB, Steilas, ESK, EHNE, Hiru eta CGT sindikatuek, Iruñean. Izan bidea dinamikaren baitan langileak aktibatu nahi dituzte, presoek jasaten duten "salbuespenezko kartzela politika" bukatu behar dela aldarrikatzeko.
Astebururako bi deialdi egin ditu SARE euskal preso, iheslari eta deportatuen eskubideen aldeko sare herritarrak euskal preso politikoen alde. Bihar, larunbatean, Berriozarretik Iruñeko espetxera martxa eginen dute. 17.30etan Berriozarreko Euskal Herria plazatik abiatuko da ibilaldia. Igandean, berriz, motxiladun haurrekin eginen dute agerraldia, 11:00etan Konstituzio plazan. Gabonen testuinguruan deitutako kalejiraren berri eta haurrek bizi duten egoeraren berri emanen dute.