Gaztelu Plazako Gabonetako Azokak, Iruñeko Udalak antolatutakoak, eskulangileen produktuen erakusketa eta salmentarako eta bidezko merkataritzarako 27 etxola izango ditu ikusgai ostiraletik, abenduak 18, aurrera. Irekiera ordutegiarekin bat eginez, 17:00etan, Silvia Azpilicueta Merkataritza eta Turismo zuzendariak azokako postuak bisitatuko ditu.
Gabonetako Azoka urtarrilaren 6ra arte egongo da zabalik, goizez eta arratsaldez, 11etatik 14etara eta 17etatik 20etara. Abenduaren 25ean eta urtarrilaren 1ean, ostiraletan, soilik itxiko dute. Egurrez egindako etxolak, Europako merkatuen antzera, urteko data hauetan ohikoak diren dekorazio eta argiztapenez inguratuta egongo dira.
Gaztelu plaza inguraturik egongo da, 6,5 metro baino gehiagoko distantziarekin etxoletaraino. Sarrera bi puntutatik egingo da, eta bertatik sartu eta irten ahal izango da. Xabierko jaitsieraren eta Sarasate pasealekuaren ondoan egongo dira. Espazio horietan edukiera kontrolatuko da, bai eta COVID-19ak eragindako osasun-krisiari aurre egiteko gainerako neurriak ere, hala nola maskara edo gel hidroalkolikoa nahitaez erabiltzea. Azokan saltzen ari diren artisau guztiek babes handieneko maskarak eramango dituzte nahitaez, eta gel hidroalkoholikoak ere izango dituzte haientzat eta bezeroentzat.
Postuetan txokolateak, pastak, gaztak, ahatetik eratorritako produktuak, marmeladak, barkiloak eta hestebeteak aurki daitezke. Bestelako produktuak ere izango dira, elikadurakoak ez direnak, hala nola zilarrezko objektuak eta xehetasunak, larrukigintza eta larrugintza, apaindutako zeramika, ehungintzako artisautza, buztingintzako elementuak, artileak edo beirazko lanak. Bidezko merkataritzaren etxola Setem Navarrak kudeatu eta zainduko du, eta hirian bidezko merkataritza sustatzen duten erakundeak bilduko ditu.
Iruñeko Udalak antolatzen du azoka, eta Elikagaien elaboratzaile Artistarren Elkarteak kudeatu ditu postuak.