Gaur inauguratuko da Nafarroako Komikiaren XI azoka. Urriaren 4ra arte erakusketa, bisita, tailer eta topaketak eginen dira. Aurten , Iruñeko kondestableren aretoaz gain beste hainbat egoitza gehiago izanen ditu azokak: Ziudadela eta Morea merkataritza-gunea, Iruñean; Fray Diego Kultur Etxea, Lizarran; eta Arizkunenea Kultur Etxea, Elizondon.
Aurtengo edizioan eskainiko diren aukeren artean lau tailer, bi masterclass, Toporen animaziozko film baten proiekzioa, marraztutako ardo dastaketa bat, zortzi elkarrizketa- topaketa publiko eta egileen artean eta hareaz eginiko bi marrazki saio, besteak beste. Eta beste berrikuntza bat: Estreinakoz azoka kalera aterako da: alde batetik Iruñeko Liburu Azokan parte hartuko du eta bestetik Sergi Diezen 'Comics con finados' Ziudadelako lorategietan eginen den erakusketa handian hartuko du parte.
