Goizean goizetik atzematen zen ezohiko uztailaren 6a zela Iruñean. Oso jende gutxi kaleetan eta koadrillatxoak auzoetan. Alde Zaharrean kolore gutietako poliziak 14 kontrol gunetan jendearen ibilerak bideratzen. Gazteluko Plazan oso jende gutxi: eguzkitan, bankuetan eserita bakar batzuk eta bisitariak argazkiak hartzen. Udaletxe Plazan azken unera arte ez dituzte itxi behar izan hesiak, 400 pertsonako edukiera muga ez baita gainditu.
Kazetari ugari, bertakoak eta Estuko komunikabide handietatik etorritakoak, zuriz jantzitakoen atzetik galdezka. Batzuk eroso eta pozik kameren aurrean, besteak, aldiz, lotsatuago.
12.05etan dena amaitu da. Hesiak kendu eta jendea sakabanatu da oso ongi nora joan jakin gabe. Plazaren erdian gelditu direnak Agoizko Gamesako langileak, pankarta handi batekin gogoratuz heldu den larunbatean, uztailaren 11an, 18:00etan, manifestazioa abiatuko dela Autobus Geltokitik.
Bien bitartean, beste batzuk lasai jarraitzen zuten dena ikusten Udaletxe Plazako terrazetako haien eserlekuetatik.