Berriozarko kiroldegiko tabernan euskaraz emanen da arreta

Euskararen ezagutzaren eskakizuna kentzeko mozioa eztabaidatu zuen atzo Berriozarko udalbatzak. EH Bildu eta Ezkerra alderdien kontrako botoekin eta PSNren eta Navarra Sumaren aldeko botoekin atzera bota zuten mozioa.

Berriozarko udalbatzak Navarra Sumaren mozio bat eztabaidatu zuen atzo. Koalizioa udal kiroldegiko tabernaren ustiapenaren kontratazio pleguaren aurka agertu zen, "euskara jakitea derrigorrezkoa delako".

EH Bilduko Raul Maiza alkateak atzo gogorarazi zuenez, tabernako arreta euskaraz izatea bermatu nahi du pleguak, "langileen aldetik, ez errentatzailearen aldetik, ez baitu zertan jakin".  "Udal ordenantza betetzeko", jendeak nahi duen bezala adierazteko eskubidea bermatu nahi du udalak. Navarra Sumak, berriz, udal taldearen hizkuntza politika kritikatu zuen, beste behin. Koalizioak ez du baztertu auzitegietara jotzeko aukera.