Atzo zendu zen Patxi Calleja kazetaritza argazkilari iruindarra, 60 urterekin. Callejak San Ignacio ikastetxean egin zituen ikasketak, eta, ondoren, Nafarroako Unibertsitatean Informazio Zientzietan lizentziatu zen.
Haren ibilbide profesionala Diario de Navarra-rekin lotuta egon da, 1980ko hamarkadan hasi zen kolaboratzen berripaper horrekin, haren anaia bikia Carlosekin.
Ordutik, fotokazetaritzaren esparru guztietan jardun zuen, eta azken urteetan, Iruñeko tokiko informazioan oinarritu zuen lana.
Nafarroako Erreportari Grafikoen Elkarteak haren atsekabia erakutsi du kidearen heriotzarengatik, eta doluminak eman dizkie "familia osoari, eta, bereziki, Carlos anaiari". Elkarteak azpimarratu duenez, Patxi eta Carlos Calleja "pieza garrantzitsuak izan dira Nafarroako Erreportari Grafikoen Elkartearen eraketan; izan ere, hasiera-hasieratik eman dute euren esperientzia profesionala eta euren humanismoa eta umorea”. Sare sozialetan ere dolumin mezu ugari izan dira.