Ana Elizalde Iruñeko jardinero alkateak iragarri du aurtengo sanferminak bertan behera geratu direla, koronabirusak sortutako egoera dela eta. “Oso tristea izan da”, aitortu du Elizaldek Internet bidez egindako agerraldian. "Uztailaren 6rako bi hilabete eta erdi falta diren arren agerikoa da gure jaiak eta koronabirusa bateraezinak direla”. Krisi kabinete batek hartu du erabakia.
Bestalde, jakinarazi du aurtengo aurrekontuetan sanferminetara bideratuta zegoen kopuruaren zati handi bat erabiliko dutela osasun krisiaren ondorioak arintzeko. Azaldu duenez, hiriko hainbat eragilerekin partekatu dute erabakia, eta "ulertu egin dute".
Oraindik ez dute erabaki jaiak atzeratuko ote dituzten: “Ezjakintasun egoera batean gaude, eta hemendik bost hilabetetara zer gertatuko den esatea ez litzateke arduratsua”. Hala ere, onartu du “konplexua” dirudiela aurten ospatu ahal izateak.
Komunikazio kanpaina
Udalak komunikazio kanpaina bat prestatu du, jaiei “omenaldi txiki bat” eginteko, eta mezu hau helarazteko: “Guztia igarotakoan, ahal denean, sanferminak biziko ditugu”. Hala, bideo bat zabaldu du, Ahal dugunean… #sanferminak #bizikoditugu goiburuarekin.