Iruñeko espetxean oraindik medikurik ez dela salatu du ELA sindikatuak. Bi arrazoi nagusi antzeman ditu: "Espetxeen Administrazioaren ardurarik eza, Iruñako espetxeko arduradun nagusia izan arren, eta Nafarroako erakundeen kontrolik eza".
Egoerak "berehalako konponbidea" behar duela ohartarazi du ELAk, gogoraraziz sindikatuak aspaldi eskatu ziela Nafarroako Gobernuaren erakundeei "espetxeen eskumena transferitzeko, baita espetxeen osasunaren arloa ere". Zerbitzuaren "ezkutuko" pribatizazioa salatu du sindikatuak.
Iruñako espetxeko osasun-arretaren zerbitzua "larriagotu" da ELAren ustez, azken egunetan bi medikuak aldi baterako ezintasuneko egoeran daudelako.
Sindikatuaren ikuspuntua azaltzeko eta egokiak jotzen dituen neurriak azaltzeko joan den astean bilera bat egiteko eskatu zioten Osasun kontseilariari. Egoera "berehala" konpondu ezean, ELAk mobilizazioak eginen dituela ohartarazi du.