Maiaren publizitate banaketaren aurka helegitea aurkeztu du Euskalerria Irratiak

  • Iruñeko euskaldun guztien hizkuntza eskubideak urratzen ari direla salatu dute irratiaren ordezkariek
  • Irrati iruindarrak 25.000 euro jaso zituen iaz publizitatean. Galerari aurre egiteko, irratiko bazkide egitera deitu dute.

Euskalerria Irratiak helegitea aurkeztu du Nafarroako Auzitegi Administratiboaren aitzinean, Iruñeko Udalaren publizitate instituzionalaren esleipenaren kontra.

Navarra Sumaren Tokiko Gobernu Batzarrak, 2019ko azaroaren 4ko erabakian, betekizun baztertzaile bat ezarri zuen publizitatea banatzeko esleipeneko baldintza pleguan: audientzia osoaren %10a gainditzea, hain justu. Azken inkesta soziologikoaren arabera (2016koa), euskaldun osoak Iruñean %10,5 direnez, baldintza horrek publizitate instituzionala jasotzeko aukerarik gabe uzten ditu euskarazko komunikabide iruindarrak, haien audientzia potentzialaren %100a lortu beharko bailukete langa hori gainditzeko.

“Kontratazio publikoetarako lehiaketetan bermatu behar den berdintasun printzipioa guztiz urratzen du, euskal komunikabideei bete ezinezko baldintzak ezartzen dizkielako”, azaldu du irratiko koordinatzaile Juan Kruz Lakastak. “Gure abokatuen irudikoz, kontratu administratiboen foru legearen aurkakoa da; eta, gure ustez, Udalaren mezuak haien hizkuntzan eta haien hedabideen bidez jasotzeko eskubidea duten Iruñeko euskaldun guztiek hizkuntza eskubideak urratzen ditu”, gaineratu du.

Lehenik eta behin, Euskalerria Irratiak helegitea aurkeztu zuen Tokiko Gobernu Batzarraren 2019ko azaroaren 4ko erabakiaren kontra. Batzarrak berak helegitea atzera bota zuen, abenduaren 24ko erabaki baten bidez, batere azalpenik eskaini gabe, besterik gabe baldintza plegua berretsiz. Hori dela eta, “babesgabetasuna” ere salatu du Lakastak. “Eraginkortasuna besterik ez dute aipatu ezarri diguten baldintza beteezina justifikatzeko. Baina eraginkortasuna neurtzeko irizpide bakarra ez da audientzia ponderatu gabea. Hizkuntza ere izan daiteke, entzuleearekiko gertutasuna, beste asko daude”, azaldu du.

Hori guztiori horrela, Euskalerria Irratiak gaur bertan aurkeztu du bigarren helegitea, honako honetan Nafarroako Auzitegi Administratiboaren aitzinean.

Bazkidetzeko deia

2019an, Euskalerria Irratiak 25.000 euro jaso zituen, Iruñeko Udalaren publizitate instituzionalean. “Gurea bezalako irrati txiki batentzat, diru hori gabe geratzea galera handia da. Gainera, urtero errepikatu daitekeena, baldin eta epaileek edo alkatetza aldaketa batek ez badute konpontzen”, azaldu du Lohizune Amatria irratiko esatariak. “Galera horri buelta emateko modurik eraginkorrena Euskalerria Irratiko bazkide egitea da”, gaineratu du. Eta bazkidetzeko bi bide eskaini ditu: euskalerriairratia.eus webgunea eta 948 17 01 51 telefonoa.

“Bazkidetzea modurik eraginkorrena da galera horri erantzuteko, eta Iruñeko euskarazko hedabide independente eta komunitarioa indartzeko”, aldarrikatu du. Euskalerria Irratiak aurrerapauso ugari eman ditu azken urteotan: lizentzia lortu zuen, irratia kalera atera du unitate mugikor berrien bidez, lan taldea gaztetu eta handitu du, webgunea ere indartu du”, esan du Amatriak. “Nolanahi ere, irratiaren indargune nagusia betikoa da: komunitatea. Gure 175 kolaboratzaileak, ehunka iragarleak, 900 bazkideak, 6.000 entzuleak. Eta proiektuak indarrez aurrera eginen badu, komunitate ahaltsu eta eskuzabal horren laguntzaz izanen da”.