“Aste gogorra izan da hau” azaldu du EH Bilduko zinegotziak, “Euskarazko hedabideei, ingenieritza politikoaren bidez trabak jartzeko erabakiari hitzaldi feminista baten zentsura gehitu zaio. Enrique Maiak atentzioa desbideratu behar zuen”. Horrela baloratu du Joseba Asironek, eremu urdinaren zabalkundeaz Maia alkateak egindako proposamena. “Okurrentzia bat da, hausnarketarik gabe eta inolako helburu teknikorik gabe” gaineratu du.
Horren harira, Joxe Abaurrea EH Bilduko zinegotziak Navarra Sumaren ardura eza salatu du. “Eremu urdinaren zabalkunde bat egiten denean ikerketa, hausnarketa eta txosten tekniko guztiak eskuetan egiten da” azaldu du Abaurreak, “Hiri osoan ordainpeko aparkatzeko sistema ezartzea, de fakto, hiritar guztiei ezarriko zaien zerga berri bat asmatzea da, ezin da edozein moduan egin eta helburu eta mugikortasun plan baten ondorio izan behar da”.