Haur eskoletako hezitzaileen lan baldintzak hobetzeko eskatuko du gaur 0-3 Plataformak

Elkarretaratzera deitu du, arratsaldeko 18:00etan, Nafarroako Parlamentuaren aurrean. Bi dira plataformaren eskaera nagusiak: ratioak murriztea eta soldatak igotzea. 

Nafarroako Parlamentuaren aurrean bilduko dira gaur, arratsaldeko 18:00etan, 0-3 Plataformako kideak, ziklo horren kalitatea hobetzeko zenbait neurri eskatzeko. Nafarroako Haur Hezkuntzako lehen zikloko profesionalek osatzen dute plataforma, eta sektorearen lan baldintzak duintzea dute helburu. Bi aldarrikapen nagusi dituzte: ratioak murriztea eta profesionalen soldaten igoera.

Lehenengo aldarrikapenari dagokionez, hezitzaile bakoitzeko haurren ratioak ezartzen dituen 28/2007 Foru Dekretua aldatzeko eskatzen dute, eta Haurren Arretarako Europako Sareak gomendatzen dituen ratioak ezartzea; sare horren arabera, profesional bakoitzak izan behar baitu egun Nafarroan hezitzaile batek dituen haurren erdia. Zehazki, egun, Nafarroan, 0-1 urteko zikloan 8 haur dituzte hezitzaile bakoitzeko, eta Europan, berriz, 4; 1-2 urtekoan 12, eta Europan 6; eta 2-3 urtekoan, 16, eta Europan, 8. Bestetik, beren ardurarekin bat datorren soldata eskatzen dute, bai eta sektorearen barneko soldata arrakalarekin amaitzea ere.

Eskaera horiek gauzatu ahal izateko eta 0-3 zikloa duintzeko, aurrekontuetan diru partida garrantzitsu bat erabil dezatela eskatu dute, ziklo horretan inbertituta, “etorkizuneko gizartearen kalitatean” inbertituko dutela nabarmenduta.