Gaurko Diario de Noticias egunkarian irakur daitekeenez, Hezkuntza zinegotzi Fernando Sesma argi mintzatu da: “Testu honek aurkezten zuen errelatoa onartezina zen, eta haren eduki historikoa berraztertzea ezinbestekoa zen. Baskoien eta euskara nabarmentzen zuten soilik, eta Gaztela-Espainia etsaien bandoan jartzen zuten, Amaiurko batailan bezala”.
Sesma Ciudadanosen zinegotzi bakarra da, Navarra Suma koalizioaren barruan, eta atzo agerraldia egin zuen Hiritarren Aferen Batzordearen Aitzinean eskola-programari buruz, EH Bilduk hala eskatuta. Sesmak iragarri zuen hainbat data historiko berraztertuko dituztela –besteak beste, 1512ko konkista– , baita euskarari buruzko informazioa ere, eta hari horretatik tiraka zalantzan jarri zuen euskara iruindarren hizkuntza izan izana duela hainbat mendetatik, eskola-programak orain arte zioen bezala. Sesmak ez zuen zehaztu noizko izanen dituzten prest aldaketok.