CCOOek elkarretaratzea deitu du ostiral honetarako, 19:00etan, Iruñeko Conforamaren atarian, "bizitzeko ordutegi bat" lelopean, gehiegizko ordutegien aurka protesta egiteko. Mercadona, Zara, El Corte Ingles, Ikea eta Eroskiko langileek bat egin dute deialdiarekin
CCOOek salatu duenez, Conforamak "aldebakarrez" erabaki du Iruñerria eta Vianako dendak bihar gaueko hamabiak arte irekitzea. Sindikatuaren iritziz, "ezin zaie saltoki handiei bizitza denbora kentzen utzi". 22:00tatik 24:00ak bitartean erostera joaten diren bezeroak sarituko dituela jakinarazi du Conformak. Ekimena "aberrantea" dela iritzi dio Josu Ros Nafarroako CCOOeko Zerbitzu Federazioko idazkariak: "Conforamak gonbidatzen du, eta langileek ordaintzen dute erronda. Onartezina da kontziliazioa eragozten duten eta plantillen eskubideak larriki kaltetzen dituzten ordutegi horiek sustatzea. Gainera, inolako interes komertzialik ez duten ordutegiak dira, eta kosta ahala kosta saihestu beharko lirateke".