2020ko uztailaren 15 eta 31 bitartean ere ordaindu egin beharko da Iruñeko aparkaleku arautuetan aparkatzeko. Hori da Navarra Sumak Nafarroako hiriburuan eremu urdina arautzen duen ordenantza aldatzeko egin nahi duen planteamendua. Gaur egun hamabostaldi horretan ez da ordaindu behar araututako eremuetan aparkatzeko. Eskuinak ez du udalbatzan erabakitzerik nahi eta zuzenean Gobernu taldean eginen dute aldaketa.
Neurri hori 2020an sartuko litzateke indarrean, eta eremu urdina duten auzoetako "bizilagunen eskariaren" arabera hartu dute, izan ere, uztaileko bigarren hamabostaldian aparkatzeko arazoak dituzte. Aldaketa horrek, Labairuk Diario de Noticiasekin izandako solasaldian mantendu zuenez, ez luke eraginik izango aparkalekuaren erregulazioan San Fermin egunetan, egun horietan 24 orduz ordaintzea derrigorrezkoa baita.