41 urteko emakume bat arin zauritu da Iruñean, auto batek harrapatuta, Salva Doktorearen eta San Martin Doktorearen kaleen arteko oinezkoen pasabidean.
Udaltzaingoak asteburuan artatu dituen hamazazpi ezbeharretako bat da. Beste bi kasutan, bi gidariri salaketa jarri diete baimendutakoa baino alkohol tasa handiagoa emateagatik. Horietako bat 77 urteko gizon bat da, Azella kalean aparkatuta zegoen auto baten kontra jo zuena; bestea, berriz, 24 urteko gazte bat, Urdazubiko Monastegia kalean bidetik atera zena, Udaltzaingoak jakinarazi duenez.
Bestalde, alkohol eta droga kontroletan eginbide judizialak hasi dizkiete hiru gidariri, edari alkoholdunen eraginpean gidatzeagatik. Hamalau gidari ere salatu dituzte administrazioan, hamaika alkohol proban positibo emateagatik, eta beste hiru droga probetan positibo emateagatik.