2020. urtean publizitate instituzionaleko kanpainak txertatzeko komunikabide pribatuetan espazioak erostea arautuko duen esparru-akordioa onartu du Iruñeko Udalak.
Hedabide bakoitzaren audientziaren "irizpide objektiboei" eta proposatzen duten "eskaintza ekonomikoari" jarraiki ezarriko dituzte iragarkiak. Lizitazio irekia da, eta Iruñean gutxieneko audientzia %10 ingurukoa duten tokiko hedabide guztiek parte har dezakete. Prentsa idatzian, irratian eta telebistan, ehuneko hori lote bakoitzeko Iruñeko audientzia osoaren %10 izango da, CIES hedabideen azterlanaren 2019ko lehen olatuaren audientzia-datuen arabera.
Erabakiarekin inbertsio publikoa "optimizatu" nahi izan du Navarra Sumaren udalak. 600.000 euroko gehieneko aurrekontua adostu dute; hau da, publizitate-aurrekontua %25 murriztu du udalak, 2019ko 800.000 euroko gastuarekin alderatuta.
%75ko pisua izanen du audientziak balorazioan
Lau izango dira aurkeztutako proposamenak baloratzeko irizpideak, Hedabidearen entzunaldia 75 puntura arte puntuatuko da; proposamen ekonomikoa (publizitate-produktu bakoitzeko tarifa ofizialen prezioei buruzko deskontuak) 10 puntura arte baloratuko da; lote bakoitzean proposatutako hobekuntzak, 5 puntura arte; eta irizpide sozialak, gehienez, 10 puntu.