Pasa den urriaren 3an Navarra Sumako Ana Elizalderen presidentziapean, kontseilua egin zuen Comiruñak. Dietak kobratzea bozkatu eta onartu zuten, tartean eskuinak izendatutako zuzeneko lau karguen parte hartzearekin. Modu honetan, pasa den legegintzaldian aldaketaren gobernuak bertan behera utzita dieta sistema polemikoa berreskuratu zuen eskuinak. EH Bilduk bere demandan azaldu duenez, entitatearen estatutoetan, “administratzaileen ordainsariak ezartzea, Batzar Nagusiaren zeregina da, hau da Iruñeko udalbatzarena” zehazten da. Navarra Sumak ez zuen dieten eztabaida Iruñeko bilkurara eraman, gutxiengoan baita eta Comiruñan bertan, beraiek izendatutako kideekin egin zuten bozketa. EH Bilduk akordio hau bertan behera uztea eskatzen dio Iruñeko Merkataritza Epaitegiari.
“Aurreko legegintzaldian bezala, dieta eta gainsoldatarik gabeko Udala izatera bueltatzea da garrantzitsuena” azaldu du Joseba Asiron EH Bilduko zinegotziak, “Horretarako posible diren bide guztiak erabiliko ditugu, bai demanda zibila, baita Comiruñako batzar nagusi baten ez ohiko deialdia”.
