Iruñeko Udalak 2020ko udal aurrekontuan 213,1 milioi euroko gastu muga aurreikusten du datorren urterako. Kopuru hori 2019ko hasierako aurrekontu luzatua (188 milioi euro) baino % 11,8 handiagoa da.
Inbertsioetara 15 milioi euro bideratu lituzke Navarra Sumak, besteak beste, Labriteko pasabidea berreskuratzeko, AHTa bultzatzeko, Santo Domingoko baratzetako aparkalekurako, Santa Engraziko presa txikia konpontzeko edota trenaren parke tematikoa garatzeko. "Ezer ez da ukiezina", adierazi du Enrique Maia Iruñeko alkateak; izan ere, Maria Echávarri Zerbitzu Orokorretako zinegotzi delegatuak azpimarratu duenez, aurrekontuen luzapena "egoerarik txarrena" da.
Lan aldi bat ireki da orain, bai teknikoa, bai politikoa, partidak zehaztu eta datorren urteko kontuen onarpena negoziatzeko. Aurrekontu proiektua lehenik Gobernu Batzordean onartu beharko da, ondoren Lehendakaritza Batzordean aurkeztu eta eztabaidatzeko, eta, azkenik, Udaleko Osoko Bilkuran jorratu beharko da.