Gaur hasiko da bigarren Bertsokabi Sariketa, Terminal tabernan

Euskalerria Irratia 2019ko urr. 1a, 15:43
Lehen Bertsokabi lehiaketaren finala (Argazkia: Euskokultur)
Orain bi urte abiatutako bideari jarraiki, bikoteka ariko dira Nafarroako 18 bertsolari gazteak. Iruñeko lau gunetan izango dira saioak, hiru kanporaketa eta finala, guztira.

2017an abiatu zuen Nafarroako Bertsozale Elkarteak BERTSOKABI-Eugenio Arraiza Sariketa, Iruñeko Udalaren eta Euskokultur Fundazioaren laguntzarekin. Orduko arrakastak hauspotuta dator sariketaren bigarren aldia, urriaren 3an hasi eta 24an bukatuko dena. Osotara, lau saio izango ditu, hiru kanporaketa eta finala, Iruñeko beste horrenbeste gune informaletan. 15 eta 30 urte bitarteko 18 bertsolari ariko dira kantuan, bikoteka.

1. kanporaketa. Urriak 3, osteguna. 19:00etan Terminal tabernan

  • Beñat Astiz-Amaia Elizagoien
  • Ainara Ieregi-Saioa Alkaiza
  • Aitor Irastortza-Xabat Illarregi

Sariketak herrialdeko bertsolari gazteei trebatzeko eta jendaurrean kantatzeko aukera ematea du xede, bai eta Iruñerriko publikoa –bereziki gazteak- bertsozaletzeko xedea du sariketak, bertsoa hiriburuko eremu informaletara eramanez. Era berean, egitasmo horren bitartez, Eugenio Arraiza (Iruñea, 1936-2015) zenaren figurari gorazarre egin nahi dio Nafarroako Bertsozale Elkarteak. Ikertzaile eta eragile nekaezina, kulturgintzaren eta euskalgintzaren alor ugaritan aritu zen Arraiza; besteak beste, Nafarroako Bertsozale Elkartearen fundatzaile eta lehendakariordea izan zen urteetan. Gainera, Udako Euskal Unibertsitatearen, Nafar Ateneoaren, Eusko Ikaskuntzaren, Arturo Kanpion Euskaltegiaren eta Karrikiri elkartearen sustatzaile ere izan zen, beste egitasmo askoren artean. Era askotako ekimenak sustatu eta babestea xede, Euskokultur Fundazioa eratu zuen 2000. urtean, Maria Josefa Fernandezekin batera. Fundazio haren egoitzak ematen dio aterpe Nafarroako Bertsozale Elkarteari.

Terminal tabernan, Zabaldin eta Mendillorriko Antzara gunean jokatuko dira hiru kanporaketak, urriaren 3an, 10ean eta 17an hurrenez hurren. Hiru bikotek (sei bertsolarik) hartuko dute parte kanporaketa bakoitzean. Saioa irabazten duen bikotea zuzenean sailkatuko da urriaren 24an Herriko Tabernan izango den finalera. Hiru bikote izango dira bertan, nor baino nor. Ondorengoa izango da sariketaren egitura:

 

2. kanporaketa. Urriak 10, osteguna. 19:00etan Zabaldin

  • Ekain Alegre-Iker Gorosterrazu
  • Irati Majuelo-Alazne Untxalo
  • Ekhiñe Zapiain-Josu Sanjurjo

3. kanporaketa. Urriak 17, osteguna, 19:00etan Antzaran (Mendillorri)

  • Mikel Lasarte-Sarai Robles
  • Endika Legarra-Joanes Illarregi
  • Etxahun Azkarraga-Patxi Castillo

Finala. Urriak 24, osteguna, 18:30ean Herriko Tabernan.

  • 1.kanporaketako irabazleak
  • 2.kanporaketako irabazleak
  • 3.kanporaketako irabazleak

Hemezortzi bertsolariez gain, beste lagun andana bilduko ditu sariketak egitasmoaren inguruan. Nafarroako gai-jartzaile taldea arituko da saioetarako gaiak prestatzen, eta gazte hainbat ere ariko da saioak aurkzten. Saioak epaitzeko arduran publikoak ere izango du zeresana, horretarako banatuko diren orrien bitartez.

Sariketak, bertsolari gazteentzako akuilu

Egun, Nafarroako Bertsolari Txapelketa eta Bardoak taldekako bertso ekimenarekin batera, bertsolari gazte eta hasiberrientzako sariketak dira Nafarroako Bertsozale Elkartearen sustapen arloko egitasmo nagusiak. Txandaka, bi sariketa nagusi izaten dira: Izeta Sariketa (Mariano Izetaren omenez, Elizondon), eta BERTSOKABI-Eugenio Arraiza Sariketa, orain bi urte hasitakoa, ordura arte Goizuetan egiten zen Xalto Sariketaren ordez.

Sariketak akuilu dira herrialdeko bertsolari gazteentzat, haien bertsogintzan sakontzeko eta publiko aurrean trebatzeko aukera ematen dieten neurian. Gerora Nafarroan plazarik plaza ibilitako bertsolari askok eman zituzten lehen urratsak gazteentzako bertso sariketetan.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!