Bigarren entzierroa izan da gaurkoa Cebada Gago ganadutegiko zezenak ikusi ditugu. Ganadutegi arriskutsua izan ohi da eta horixe erakutsi dute urteotan, baina gaur, azkar eta garbi egin dute entzierro osoaren ibilbidea. Bi minutu eta hogeita hiru segundu behar izan dituzte ez besterik zezen plazan sartzeko.
Lasterraldi politak ikusi ahal izan dira, batez ere beterano diren zenbait korrikalarik egindakoak. Jendea bazen, nahiz eta astelehena izan gaurkoa.
Zezenak modu ordenatuan aritu dira lasterka, azken tartera arte, Estafetan zertxobait bereiztu dira baina ez dute arrisku gehiegirik eragin. Lehen datuen arabera adarkadaz pertsona bat zauritu da eta beste lau izan dira erorikoen erruz kaltetuak.
