Pintxo solidarioak festa giroan probatzeko aukera izanen da. Ateratako dirua Greziako errefuxiatuen kanpalekuetan otorduak banatzeko baliatuko dute. 5.000 pintxo izanen dira 30 postutan. San Frantzisko plazan izanen da ekimena eta musika zein dantza ikuskizunak ere izanen dira: Ziripot txarangarekin eta Oberena dantza taldearekin. 11:00etan hasiko da ekitaldia.
Lesbos irlan ari da otorduak banatzen egun Zaporeak ekimena. 1.600 afari banatzen ditu egunero. Gainera, Greziako beste kanpalekuetara ere elikagaiak bideratzen dituzte. Egoera latzean segitzen dute euren herrialdeak utzi eta bizitzeko aukera hobearen bila dabiltzan herritarrak. Errefuxiatuentzako erabiltzen dituzten espazioetan ez dago bizitza duinik egiteko aukerarik eta Zaporeak ekimenak, otorduak behintzat duinak izan daitezen egiten du lan. Gizartearen beharra azpimarratu dute baliabideak behar direlako elikagaiak iritsi daitezen.