Aisialdirako gune klandestinoa da Marques de Rozalejoko eraikina. Gaztetxea bilakatu dutenetik noiznahi erabiltzen dute legez kanpoko taberna moduan eta adin txikikoei alkohola saldu nahiz adin txikikoak tabernari izaten dituztela ere salatu du UPNk. Hori esateko udaltzaingoak jarritako zortzi salaketa baliatu ditu: urritik abendura arteko salaketak dira. Gehienak, legez kanpoko taberna gisara funtzionatzeagatik.
Maravillas gaztetxearen fatxada gainera aldarrikapen politikoak egiteko baliatzen dutela ere kritikatu dute. Gaur, larunbaterako deitua dagoen presoen kaleratzea eskatzeko manifestazioaren pankarta dago zintzilik. Eta maiz aldatzen dituzte gisa horretako beste aldarrikapenak egiteko.
Ardura gobernuarena da eta hari jarri dizkiote salaketak udaltzainek. Gainerako tabernekiko errespeturik gabe jokatzen ari direla ere uste dute. Zergak eta ordenantza betearazten dituzten bitartean, gaztetxean nolanahi dabiltza. Gaztetxearekiko pasibotasuna eta utzikeria dagoela salatu du UPNk.