Eraso sexistak, Altsasuko auzia, Trumpen migrazio politika, Hazte Oir taldearen autobus transfoboa, euskararen ofizialtasuna… horiek dira, besteak beste, peñen pankartetan azaltzen diren gaiak, gaurkotasunari begira jartzen baitira beti Iruñerriko hamasei peñen ohialak. Detaile bat, eraso sexisten aurkako mezuak presente badauzkate ere, nabarmena da genero langa: aurten, 74 gizon eta 23 emakume azaltzen dira irudietan; eta emakume horietako zazpi, eraso matxistak salatzeko.
Oihaletan, izen ezagun ugari ere bada. Politikariek dute urrezko postua, baina badira herri mugimenduetako partaideak, Osasunako kideak, zein sanferminetako pertsonaia mitikoak. Politikarien artean: Joseba Asiron Iruñeko alkatea, Armando Cuenca Aranzadiko zinegotzia, PPko burua Ana Beltran, Donald Trump AEBetako presidentea…
Larunbatean, ikusgai
Larunbatean aurkeztuko dituzte pankartak jendaurrean, Peñen egunean, 12:00etan, zezen plazaren aurrean. Horrez gainera, egun osoko egitaraua aurkeztu dute larunbaterako: esaterako, 'Txupin Etxepare' saria emanen diete peñetako lehenengo emakumeei, 14:00etan eta, horrez gain, Grand Prix erraldoia muntatuko dute. Helburua: "bazkideen partaidetza sustatzea eta bazkideen arteko harremanak indartzea".
