Musika, akrobaziak, dantza eta antzerkia uztartzen dituen ikuskizun hau Jaso Ikastolak aurkezten duen 5. musikala da. Imanol Janices, Edu Serna, Irantzu Zabalza eta Nerea Martínezen zuzendaritzapean, Jasoko 12-16 urte bitarteko 50 ikaslek parte hartzen ari dira lan honetan.
Proiektuaren helburua euskararen sustapena da, multidisziplinarra den antzerki musikal formatua erabiliz. Aldi berean, ikasleei konpetentzia bidez lan egiteko aukera eman nahi zaie, bakoitza motibatuta sentitzen den alorrean parte hartuz. Modu honetan diziplina, talde lana, motibazioa eta batez ere talde elkartasuna bezalako baloreak landu egiten dira.
Sarrerak 12 euroan daude salgai.
Ikerrek sortutako denboraren makinak ez du behar bezala funtzionatzen. Etorkizunera behar zuen bidaia, abenturaz beteriko iraganera egindako bidaia bihurtu da. Makina funtzionaraztea eta bidaian zehar sortutako arazoak konpontzea izango da Iker eta Ane zientzilarien helburua. Musikal honek gainera, bi kontzeptu nagusi gizarteratu nahi ditu: amestea eta lantzea bizitzan jarritako helburuak lortzeko bidea dela batetik; eta bestetik, emakumeen eta gizonen arteko aukera berdintasunean kontzientziatzea.
Ortzi Murugarren, Izaskun Zabalza, María Nabal, Nerea Roldan eta Imanol Janices.
