Epaitegiak plazaratu berri duen autoaren arabera, "arrazoizko susmoak" daude auzipetutako bost gizonezkoek delitua egin zutela pentsatzeko Biktimaren aitorpena, analisien emandako datuak, erasotzaileek grabatutako bideoak eta Udaltzainek aurkitutako frogak hartu dira oinarri epaiketaren beharra argudiatzeko. Defentsek adierazia zuten auzipetuen kontrako aski frogarik ez dagoela, eta haien errugabetasun presuntzioa errespetatu behar dela, baina autoaren arabera, ez dute aski funtsik argudio horiek.
Bost auzipetuak espetxean daude sexu eraso eta indarkeriaz eginiko lapurreta delituak egotzita.
Uztailaren 7an, goizaldeko 3:00etan, Paulino Caballero kaleko atari batean gertatu zen talde erasoa. Biktima 18 urteko neska madrildar bat izan zen. Salaketa jartzean biktimak emandako deskripzio fisikoari esker atzeman zituzten ustezko erasotzaileak.
Epaileak ustezko bost erasotzaileak espetxeratzeko agindua eman zuen, eta ikerketan zehar, Iruñeko epaileak beste eraso baten zantzuak topatu zituen. Zehazki, zantzuak topatu zituen adierazteko Iruñeko erasoagatik inputatutako bost gizonetatik lauk 21 urteko emakume bati sexu erasoa egin ziotela Kordoban Joan den maiatzean eta erasoa sakelako telefonoarekin grabatu eta partekatu zutela.
