Antoniuti, Sarasate pasealekua, Foruen plaza, Gurutze plaza, Gazteluko plaza eta Konpainia plaza. Iruñeko Udalak girotuko dituen sei espazioak dira. Estiloen arabera banatu ditu.
Sarasaten, jota eta bertsoak
Sarasate pasealekuan, jotak egonen dira entzungai goizetan. Arratsaldeetan, berriz, bertsolariak eta dantzariak azalduko dira.
Konpainian, jazza
Konpainia plazan, Jazzfermin zikloa jarriko dute abian, 9tik 12 arte. Saio bikoitza atonduko dute egunero: 21:00etan eta 00:00etan kontzertuak entzun ahalko dira. King Solomon, Mikel Andueza Sexteto, Spyro Gyra eta Chano Dominguez egonen dira, besteak beste.
Foruen plazan, denentzako estiloak
Foruen plazarako prestatu dute programazio zabalena. Oparoa izanen da estiloetan: Ducan Dhu, Muchachito, Delorean, Fermin Muguruza, Willis Drummon, Arianna Puello eta Asian Dub Foundation igoko dira oholtzara. Gainera, teloneroen laguntza ere izanen dute.
Gazteluko plazara dantzara
Gazteluko plaza dantzaldien bihotz bilakatuko da: uztailaren 6an, Vulkano Show; 7an, Nueva Alaska; 8an, Miami Show; 9an, Diamante Show Band; 10ean, Nueva Era; 11n, La Tarantela; 12an, London; eta 13an, Jamaica Show.
Antoniuti mundu bilakatuta
Antoniutin, "munduko musikak" batuko dituzte, udal ordezkarien esanetan. Hala, askotariko estiloak, erritmoak eta konposizioak joko dituzte, bertaratzen direnen gozagai. Saritah, Cuban Beats All Starts, Danbakhan Afrofusion, Rarefolk, Dr. Maha, Spyrow eta Kalakan dira gonbidatutakoak.
Gurutze plaza: eskaintza zabala
Musika bandak egonen dira Gurutze plazan. 1970eko hamarkadako izarretako batek zapalduko du tabladua: Los Diablos taldeak. Harez gain, makina bat artista egonen dira: La Fania Perfect, Moncayo Band, Conexion, Oceanic, Niagara eta beste.
Iruñeko Udalak 417.000 euro bideratu ditu egitarau horretarako.