Sanferminetako egitarauaren mahaiak aztertu beharko du Iruñeko Udalak luzatutako proposamena orain, udalbatzak sei espazio elkarteen eta kolektiboen esku utzi nahi dituelako.
Sanferminetan, "herri kultura parte hartzailea" sustatzen duten horiek tokia eska dezaketela iragarri du udalak, "festen parte hartzaile aktibo" izan daitezen.
Batetik, guneak utzi nahi ditu irabazi asmorik gabeko entitateen esku; bestetik, bere gain hartuko ditu komunak eta beharrezko azpiegiturak muntatzeko ardura, bai eta segurtasuna eta garbitasuna ere.
Udalak egindako proposamena onartzeke eta aztertzeke dago oraindik.
Gora Iruñeak ere jai gune txikiak ezartzeko aukera zabaldu du, eta proposamen horrek zer nolako bidea eginen duen ez dute zehaztu oraindik.
