Folka, jazz, bluesa, rocka... Askotarikoak dira Kantu eta hitza zikloan entzun ahalko diren doinuak. Ostegunero izanen dira, ostegun honetan bertan hasita, Erraldoien Txokoan, 20:30ean. Iruñeko Udala da antolatzailea, eta doan izanen dira ekitaldi guztiak.
Iban Urizarrek zabalduko du jaialdia, usadiozko herri musika eta esperimentazioa zein bat-batekotasuna uztartuz. Horra lehenengo zita.
Bigarrena: Mixel Etxekopar&Beñat eta Julen Axiari. Orhipetik lana aurkeztuko dute, hilaren 26an.
Ekainean sartuta, Maialen Errotabehereren txanda izanen da, Biluzik taularatuko du, Itxaro Bordaren eta Jean Luoisen testuak oinarri, bere esperientziaren inguruko espektakulua emanen du, hitza eta musika zutabe.
Joseba Irazoki eta lagunak ikusteko aukera ere egonen da. Ekainaren 9an joanen dira Erraldoien Txokora.
Eta jazzak ere izanen du tokirik, ekainaren 16an, hain justu. Iñaki Salvador musikaria igoko da oholtzara, Ainara Ortega jazz abeslariarekin batera, Kantaginjazz bataiatu dute espektakulua. Mikel Laboa, Benito Lertxundi, Xabier Lete, Oskorri, Mikel Markez... euskal sortzaileen lanak berrinterpretatuko dituzte, jazzaren berezko ukituekin.
Ekainaren 23an, Aukhera obra joko du euskarazko folk talde Kherauk. Nazioarteko folklorearen ezaugarriak eta euskal instrumentu tradizionalak uztartuko ditu boskote bizkaitarrak.
Jon Gurrutxagak itxiko du zikloa, ekainaren 30ean, bere buruari buruzko hausnarrak erdigunean dituen proiektu batekin. Tartean, gainera, blues eta rock doinuak presente egonen dira.
Hemen ikus dezakezu programazioa osorik, xehetasun guztiekin.