“Euskal Herriko hiriburuetako alkateak. Euskararekiko harremana eta etorkizuneko erronkak' izeneko jardunaldiak antolatu ditu HUHEZI, Modragon Unibertsitateko Humanitate eta Hezkuntza Zientzietarako Fakultateak. Lan saio honetan Bilboko Juan Mari Aburto; Gasteizko Gorka Urtaran; Donostiako Eneko Goia; Mauleko Michel Etsebest eta Iruñeko Joseba Asiron alkateak izan dira.
Joseba Asironek azpimarratu duenez Iruñean lan handia egin beharko da urtetan euskara “desagerrarazten” saiatu izan direlako “arrotza den zerbait ia bihurtu arte”. Honi gehitu dio: “Gure erronka da euskarak erabilera esparruak berreskura ditzan, hiritarren hizkuntza eskubideak bermatuz eta hizkuntzaren presentzia agerikoa eginez gure hirian”. Modu berean Asironek azaldu du lanean ari direla “Administrazioan erabilera normalizatzeko, euskal kulturaren alorrean elkarlana sustatzeko eta euskararentzako diru partidak handitzeko”.