"Ez gaude 1970. urtean. Beltz batek baino ezin du Baltasarrena egin". Irmo mintzatu du Iruñeko alkate Joseba Asieron, ahoan bilorik gabe. Eta iruzkina egin du, gainera: "Aurpegia beltzez eta ezpainak karmin gorri biziz margotzea ez da kultur aniztasunarekiko begirunez jokatzea".
Iruñeko udaleko talde gehienek ere bide bera hartu zuten, abenduaren 10eko saioan, eta beltza izan dadin eskatu zuten. UPN izan zen kontra azaldu zen bakarra.
Enrique Maya alkate ohiaren hitzak dira erregionalisten jarreraren lekuko: "Kabalgatak erlijio osagai garrantzitsua dauka, bai eta festa osagaia ere, erlijizioaz harago. Baltasar arraza beltzeko pertsona izatea ala ez, ez da funtsezkoa".
Urak bare ez badaude ere, ez dirudi Errege Magoen Kabalgatako Elkartea aldaketarik egitea aztertzen ari denik. Batzarra egin zuen abenduaren 28an, eta bertaratukoen artean beltzez margotutako pertsonaiaren alde egin zuen gehiengoak, %74 hain justu.
Umorea eta txantxak, nagusi sarean
Sare sozialak. Horra kaleko iritzien egungo plazarik behinena.
Aritz Ibañez Lusarreta kazetariak Oier Araolazak 2009an margotutako Baltasar beltzen eztabaida berreskuratu du memoriaren kutxatik.
"Iruditeria mitikoak ihes egiten dio egiantzekotasunari, baina horrek ez dio benetakotasunik kentzen" #baltasar https://t.co/CDFGpnKBIb
— AritzIbañezLusarreta (@aritzibanez) December 30, 2015
Bestalde, garratz hartu du gaia Patxi Huarte marrazkilariak, gaur, Berria egunkarian.
Gaurko zinta @berria n, Alde Iluna pic.twitter.com/ZTZQ6qg9Nv
— P.Huarte Larraburu (@zaldieroa) January 3, 2016
Ion Orzaiz erabiltzaileak ere meme bat sortu du.
— Ion Orzaiz (@IonOrzaiz) December 30, 2015
Eta Sabino Cuadra diputatu ohiak ironia izan du ardatz txiokatzeko orduan:
Melchor eta Gaspar zuriz mozorratutako beltzak izanen direnean arrunta irudiko zait Baltasar beltzez tintatutako zuria izatea
— sabinocuadra (@sabinocuadra) December 31, 2015
Aldaketa, 2017rako
Eskuak lotuta. Horrela dago udala aurtengo kabalgatari dagokionez, dena itxita baitago. 2017 paratu dute jada ikusmira. "Urtarrilean bertan hasiko gara datorren urteko kabalgataren inguruko eztabaidan". Hitzok egin ditu Asironek.