1936ko gerraren aurretik Iruñean izan zen Veleta peñakoen ondorengoek eta Iruñeko Orfeoiak botako dute aurten sanferminetako txupinazoa. Joseba Asiron Iruñeko alkateak hala baieztatu du. "Txupinazoaren protagonismoa herritarrei itzultzea da asmoa, sanferminetako beste ekitaldi guztietan bezala", azpimarratu du Iruñeko alkateak. Aurten dena dela, denborarik ez da izan parte hartze prozesua adosteko, eta erabakia hala hartu behar du udal gobernuak.
Iruñeko Orfeoiak 150 urte beteko ditu aurten, eta urteurrena baliatu du udal gobernuak txupinazoa botatzeko aukera emateko. Iaz eskatu zuen orfeoiak berak txupinazoa botatzea, eta orain oso pozik agertu da erabakiarekin. Orfeoiarekin batera, Veleta peñakoen ondorengoek ere botako dute. Sanferminetan erabiltzen den jantzi txuri-gorriaren oinordekoak dira Veleta peñakoak.
Sanferminetako programa bere aldetik gaur aurkeztuko du Asironek berak Hezkuntza eta Kultura kontseilariarekin Maider Belokirekin batera.
