Hiru hilabete. Epe hori eman dio Nafarroako Parlamentuak Hezkuntza Departamentuari behingoan San Frantzisko ikastetxeko jolastokiaren arazoa konpontzen hasteko. Legebiltzarreko Hezkuntza Departamentuak aho batez onartu duen ebazpenaren arabera, egitasmo "balioaniztuna eta berritzailea" egin beharko du Jose Iribasen departamentuak, ikastetxeko hezkuntza komunitatearekin eta Iruñeko Udalarekin lankidetzan. Estalkidun jolastokiarekin ikasleek jostatzeko toki gehiago izanen dute, eta toki zabalagoa Gorputz Heziketako eskoletarako.
Ebazpenaren bigarren puntuan behin-behineko soluzio bat ere eskatu dio Parlamentuak Nafarroako Gobernuari; jar dezala karpa bat edo nolabaiteko estalki bat, gutxienez jolastokiaren erdia estaltzeko. Puntu honetan abstenitu egin da UPN.
Jolastokia aire zabalean
San Frantzisko ikastetxea eta Hegoalde Ikastola dira gaur egun jolastoki estalirik ez duten Iruñeko ikastetxe publiko bakarrak. Horrek eragin zuzena du, noski, ikastetxearen egunerokoan: eguzki ala euri, haurrak aire zabalean dagoen jolastokian, Gorputz Heziketako eskolak ongi prestatuak ez dauden tokietan egin beharra, legeak ezarriak dituen gehienezko mugak gainditzen dituen zarata maila, eguraldiaren arabera antolatu beharra jolasorduak, eskolaz kanpoko jarduerak eta ospakizunak.
Aspaldiko eskaera
2003-2004 ikasturtetik Eskola Kontseiluak urtero jaso izan du bere bilera aktan jolastoki estaliaren eskaera, baina erantzunik ez du jaso orain arte, ez Iruñeko Udaletik ez Nafarroako Gobernutik.