Zertarako hau ikasi?

Musika eta historia uztartuko ditugu Iñigo Hernandezekin.

Gaur Irene Galarragarekin Irati filmaren inguruan mintzatuko gara. 

Gaur kirolaz hitz egingo dugu, bai, ongi irakurri duzue, kirolaz. Baina noski, historia, memoria eta ondarearen bidez. Baina nola egin genezakeen gure hiriko futbol taldea aipatu gabe? Mikel Huarte izan dugu Osasunaren hastapenaz eta 1936tik aurrera taldearen sortzaileek eta partaideek bizitako errepresioaz mintzatzeko.

Gaurkoan Gerra Zibilarekin hasitako bortxazko lanen inguruan arituko gara. Zehazki, nafar Pirinioko gotorleku-lerroaz, gerra-gatibuek egindakoa. Horretarako Fernando Mendiola historialaria etorri da gurekin. Zer dira bortxazko lanak eta nolakoak izan ziren langile batailoien hastapenak?

Denboraldi erdialde honetan hainbestetan mintzo garen historia sozialera itzuli gara, Javier Buces historialariarekin. Trantsizioaz eta honen memoriaz ere, Gipuzkoaren kasuan zentratuz.

Saio berri honetan Irati Zurbano Cabeza Ladrero proiektuaz mintzatuko da. Gainera, eta proiektu horri lotuta, gazteek aurrera ateratzen dituzten proiektu ezberdinez ere arituko gara solasean.

Gaurkoan gizarte eta ingurumenarekin lotura duen historia jorratuko dugu. Izan ere, Anne Biurrun historialaria irratira gonbidatu dugu Itoizko urtegiaren inguruan hitz egiteko. Zer ondorio izan zituen eraikuntza horrek bailarako ingurumenean, herrietan eta gizartean? Zer nolako diskurtsoak eraiki ziren? Zer motatako protestak abiatu ziren? 

Gaurko atalean, 2x4 Euskal historialariak munduan saioko gaiari berriro helduz, Amaia Iraizoz ekarri dugu irratira, XIX. mendeko euskal diasporaz hitz egiteko. Izan ere, euskal diasporak asko direla ikusiko dugu. Gaur, Aezkoa bailaratik Ameriketara gertatutako diasporari erreparatuko diogu bereziki. Zer ondorio izan zituen diaspora horrek familian, roletan eta herrietan?

Askotan memoriaz hitz egin dugu eta honek duen garrantziaz, baina gaurkoan memoria eta omenaldi hauen parte diren hiru musikarirekin solasean egon gara musikak memorian daukan garrantziaren inguruan.

Gaur atzerrian egoteaz hitz egin dugu lagunartean. Nola ikasten da historia? Nola da praktikak atzerrian egitea? Bizipenak, desirak eta gogoetak jaso ditugu.

Paisaiak begiratzeko modu asko daude, baita hauek ikertzeko ere, eta gaurkoan paisaiaren arkeologiaz mintzatuko gara Alvaro Martin arkeologo eta historialariarekin. Nola ikertu paisaia? Nola ezagutu dezakegu hobe landa eremua?

Martxa hartzen goaz eta gure denboraldiko lehen gonbidatua ekarri dugu irratira, Pako Gomez historialari eta arkeologoa. Zein da bideek duten garrantzia?

Denboraldi berriari hasiera emanez, bostak udan bizitako esperientziaz eta hauek sortarazi dizkiguten galderaz eta eztabaidez mintzatuko gara: turistifikazioa, museologia, jasangarritasuna edota produktu kulturalak. Beti bezala meloiak irekitzen denboraldiaren bideak izan daitezkeenak bideratzeko.