Larunbatean egin zuten manifestazioa Burlatako Gaztetxearen alde eta Gazte Asanbladak iragarri du gaztetxearekin jarraitzeko akordiora iritsi direla Burlatako Udalarekin.
Manifestazioaren amaieran egin zuten publiko iragarpena eta adierazi bezala, Udalak Gaztetxearen gutxieneko eskakizunak betetzen dituen proposamena jarri du mahai gainean, beraz, aurrera eginen du Burlatako Gaztetxeak. Oraindik ez dute zehaztu zein izango den Gaztetxearen kokaleku berria. Hala ere, ohartarazi dute ez dutela eraikina utziko lotutako aurre-hitzarmena martxan izan arte.
2018an zabaldu zuten lehenbizi gaztetxea eta azken urteotako kokalekua, Arga parean izan da, Nogalerako zonaldean. Baina, uholde arriskuko zonaldea da hori eta Burlatako Udalak eremu seguru bihurtzeko plana onartu eta garatu behar du bertan. Hartara, egungo gaztetxearen kokalekua ezin zen mantendu.
Bidenabar, azken hilabeteotan izandako jarrera salatu zuten larunbatean eta, oro har, gune autogestionatu eta gaztetxeek pairatzen duten zapalkuntza.
