Joe Sacco kazetari eta komikigile estatubatuarrak hamarkadak daramatza Palestinaren zapalkuntza marrazki bidez kontatzen. Palestina komiki mardula da akaso denetan ezagunena, lehenengo Intifadaren osteko garaia islatzen duena, 1991 eta 1992koa. 2023tik aurrera Palestina sufritzen ari den genozidioa ere islatu zuen, kasik gertakarien momentu berean, Gerra Gazan lanean. Bien bitartean, Gazako oin-oharrak ere plazaratu zuen, 2009an. Hiru hauek, orden honetan, gure hizkuntzan irakurtzeko pribilegioa daukagu euskaldunok, Astiberri argitaletxeari eta, noski, itzultzaile lanak egin dituen Julen Gabiriari esker.
Esker on hori erakutsi nahi izan diote Gabiriari aurten, Biurdanako institutuak urtero antolatzen duen Euskal Liburuaren Irakurketa Publikoaren edizio berrian, ostegunean eta ostiralean eginen dena. Ostegunean, Komikia gauza serioa da izenburupean, egilea mahai-inguruan arituko da Maite Mutuberria eta Andrea Prosper ilustratzaileekin eta Martintxo Etxauri artistarekin. Ostiralean, aldiz, irakurketa publikoa eginen da Biurdana Institutuan bertan.