Emakume eta Zientzialarien Nazioarteko Egunean, ospatzeko baino aldarrikatzeko gehiago dagoela nabarmendu dute Nerea Zabaleta ikerlariak eta Maite Solas neurozientzialariak. Nazio Batuen Erakundeak izendatutako egunaren helburua emakumeek eta neskek zientzian sarbide eta parte-hartze erabatekoa eta berdintasunezkoa izatea den arren, asko gelditzen da hori erdiesteko. Datuak argiak dira: unibertsitateko zientzia ikasketen ikasleen erdia emakumeak diren arren, arloen arteko banaketa desorekatua da: erizaintza ikasketetan %73a diren bitartean, ingeniaritza edo informatikakoan ez dira herenera iristen. "Hodi apurtuaren efektua" ere aipatzekoa da: ikasketen ibilbidean aurrera egin ahala, gero eta gutxiago dira emakumeak: soilik %27 dira emakumeak katedratikoen artean.
Ikasketei bakarrik ez, eta lan arloan emakume zientzialariek aurkitzen dituzten traben inguruan ere mintzatu gara bi zientzialariekin. Kontziliazioa, zaintza lanaren kargak, lidergo eredu maskulinoak, emakumezkoen eredu eta erreferente falta, genero rolak... Azkeneko urteotan eman diren aurrerapausoak nabarmenak diren arren, genero arrakala oso handia da oraindik ere, baita gizonezkoen kontzientziazio eta konpromisoari dagokionez ere.